October 26, 2015
« បណ្ណសារស្ថិតក្នុងគ្រោះថ្នាក់ ៖ ការពារអត្តសញ្ញាណសាកលលោក – ការចងចាំឥណ្ឌូចិន »
ទិវាបេតិកភណ្ឌសោតទស្សន៍ពិភពលោករបស់អង្គការយូណេស្កូ – ថ្ងៃទី២៧ ខែតុលា ឆ្នាំ២០១៥ មជ្ឈមណ្ឌលបុប្ផាណា សហការជាមួយ វិទ្យាស្ថានបារាំង និងមជ្ឈមណ្ឌលខេមរសិក្សា ដើម្បីប្រារព្ធព្រឹត្តិការណ៍ មួយសប្ដាហ៍នៃការបញ្ចាំងខ្សែភាពយន្ដ
ចាប់តាំងពីឆ្នាំ២០០៧មក អង្គការយូណេស្កូ បានចាត់ទុកថ្ងៃទី២៧ តុលា ជាថ្ងៃនៃទិវាបេតិកភណ្ឌសោតទស្សន៍ពិភពលោក ដើម្បីរម្លឹកឡើងវិញដល់ពិភពលោកនូវការងាររបស់ស្ថាប័នបណ្ណសារ ដែលជាឱកាសនៃការបង្ហាញនូវការងាររបស់ពួកគេ ក៏ដូចជាប្រារព្ធទិវាបេតិកភណ្ឌសោតទស្សន៍ពិភពលោក។ក្នុងរយៈពេលមួយ សប្ដាហ៍ មជ្ឈមណ្ឌលធនធានសោតទស្សន៍បុប្ផាណា និងវិទ្យាស្ថានបារាំងប្រចាំនៅកម្ពុជា សហការធ្វើការបញ្ចាំងភាពយន្ដដ៏កម្រស្ដីពីឥណ្ឌូចិន ជូនសាធារណជនទស្សនា ដែលថ្មីៗនេះត្រូវបានជួសជុលឡើងវិញដោយមជ្ឈមណ្ឌលជាតិភាពយន្ដ បារាំង និង គំនូរជីវចល ជាលើកទីមួយនៅកម្ពុជា។
ភាពយន្ដដែលនឹងចាក់បញ្ចាំងទាំងអស់ គឺក្នុងគោលបំនងចែករំលែកប្រវត្តិសាស្រ្ដ និង ការចងចាំនៃប្រជាជននៅឥណ្ឌូចិន ហើយលើសពីនេះ គឺលើកឡើងអំពីបញ្ហាអត្តសញ្ញាណរបស់ប្រជាជន ដែលរស់នៅក្រោមអំណាចអាណានិគម។
ការបញ្ចាំងភាពយន្ដនឹងប្រព្រឹត្តទៅនៅថ្ងៃបើកទិវាបេតិកភណ្ឌសោតទស្សន៍ពិភពលោក និងមានរយៈពេលពេញមួយសប្ដាហ៍។
នៅថ្ងៃទី២៧ តុលា ដែលជាថ្ងៃការបើកសម្ភោធនៃការចាក់បញ្ចាំងភាពយន្ត មជ្ឈមណ្ឌលបុប្ផាណា នឹងស្វាគមន៍ លោក ហង់រី ឡូកា អមដោយបាឋកថាស្ដីពីឥណ្ឌូចិន។
នៅថ្ងៃទី៤ វិច្ឆិកា ជាថ្ងៃបិទការបញ្ចាំងភាពយន្ដ អមជាមួយនឹងបាឋកថា ដែលផ្ដល់ជូនដោយលោក ឃួន វិច្ឆិកា «បាត់ដំបងក្នុងបរិបទនៃការថមថយអំណាចរបស់បារាំងនៅឥណ្ឌូចិនក្នុងកំឡុងសង្រ្គាមលោកលើកទី២» ។