ការបន្លឺសំឡេងរបស់ស្ត្រីជនជាតិដើមភាគតិច និងក្រុមដែលត្រូវបានគេរើសអើង តាមរយៈពហុប្រព័ន្ធផ្សព្វផ្សាយថ្មី

Voice - Shooting in Province 1

នៅទូទាំងពិភពលោក ជនជាតិដើមភាគតិចប្រឈមមុខនឹងការលំបាកខ្លាំងក្នុងការថែរក្សា និងការបង្កើតគំរូនៃការអភិវឌ្ឍ និងរបៀបរស់នៅរបស់ពួកគេ ដោយសារតែតម្រូវការបច្ចុប្បន្ន និងបំណងប្រាថ្នានាពេលអនាគតរបស់ពួកគេ ជានិច្ចកាល គឺខុសពីប្រជាជនទូទៅ។ ទោះបីជាក្រោមច្បាប់អន្តរជាតិ ជនជាតិដើមភាគតិចត្រូវបានគេផ្ដល់ឱ្យនូវសិទ្ធិយ៉ាងពេញលេញ ប៉ុន្តែទំនៀមទម្លាប់វប្បធម៌ដ៏កម្រ និងដាច់ដោយឡែករបស់ពួកគេ តែងតែត្រូវអ្នកដទៃច្រានចោល ឬគៀសចេញពីសង្គម។ ដូច្នេះ សេចក្ដីថ្លៃថ្នូរ និងភាពស្មើគ្នារបស់ពួកគេ អាចមានទៅបាន គឺតាមរយៈការទទួលស្គាល់ និងការការពារសិទ្ធិរបស់ពួកគេទាំងជាលក្ខណៈបុគ្គល ទាំងជាសមូហភាព ទៅតាមក្រុមពិសេសនីមួយៗ។

Voice - Shooting in Province 3 Voice - Shooting in Province 2 Voice - PWD

សហគមន៍ជាច្រើនគឺជាជនជាតិដើមភាគតិចដោយសារទីតាំងភូមិសាស្រ្ត។ តែបញ្ហាដើមកំណើតខុសគ្នា សង្គម និងប្រវត្តិសាស្ត្រសាំញ៉ាំនៃនយោបាយ បានធ្វើឱ្យពួកគេកាន់តែយ៉ាប់។ សូម្បីតែនៅក្នុងសង្គមដែលមានការភ្ជាប់ទំនាក់ទំនងល្អ សហគមន៍ជនជាតិដើមភាគតិចនៅតែត្រូវដឹកនាំជីវិតរបស់ពួកគេដាច់ដោយឡែក។ ប្រឈមនឹងការរើសអើង និងការផាត់ចេញពីសង្គម វាជារឿងមួយលំបាកណាស់សម្រាប់ក្រុមមនុស្សទាំងនេះ ក្នុងការបញ្ចេញសំឡេង និងបន្តប្រពៃណីរបស់ខ្លួន។ បញ្ហាមួយចំនួន ដូចជាការរឹបអូសយកដីធ្លី ជម្លោះនយោបាយ និងសង្គម អសន្តិសុខ ការផ្លាស់ទីលំនៅ អត្រាចុះសំបុត្រកំណើតទាប ការទទួលបានសេវាអប់រំ និងសេវាថែទាំសុខភាពនៅមានកម្រិត ហើយនឹងគ្មានលទ្ធភាពទទួលបានសេវាយុត្តិធម៌ និងសេវាសំខាន់ៗដទៃទៀត ក្នុងនោះរួមមានសេវាសង្គមកិច្ចផងដែរ សុទ្ធសឹងជាបញ្ហាដែលរាំងស្ទះពួកគេក្នុងការអនុវត្តសិទ្ធិរបស់ខ្លួន។

ជាពិសេស ស្ត្រីជនជាតិដើមភាគតិចត្រូវការនូវការទទួលស្គាល់ពីអ្នកដទៃ ដើម្បីទប់ទល់នឹងកង្វះការយកចិត្តទុកដាក់ និងការមិនឱ្យតម្លៃពីអ្នកដទៃចំពោះឋានៈ សមត្ថភាព និងតួនាទីរបស់ពួកគេ។ វាចាំបាច់ណាស់ក្នុងការរៀបចំព្រឹត្តិការណ៍ដែលអបអរសាទរពីគុណសម្បត្តិ និងថាមពលរបស់ស្រ្ដី ជាជាងរៀបព្រឹត្តិការណ៍ដែលចង្អុលពីភាពទន់ខ្សោយរបស់ស្ត្រី។ ព្រឹត្តិការណ៍ដែលអនុញ្ញាតឱ្យស្ត្រីជនជាតិដើមភាគតិចអាចបង្ហាញពីសិល្បៈ ជំនាញ ចំណេះដឹង និងភាពអត់ធ្មត់របស់ពួកគេ គួរតែទទួលបានការគាំទ្រក្នុងការរៀបចំ។ ប្រព័ន្ធផ្សព្វផ្សាយដូចជាទូរទស្សន៍ និងវិទ្យុ គួរជួយធ្វើយ៉ាងណាបង្កើតការនិយាយអំពីស្ត្រីជនជាតិដើមភាគតិច ផ្តល់សំឡេងបញ្ចេញមតិដល់ពួកគេ និងផ្សព្វផ្សាយពីសកម្មភាពរបស់ពួកគេ។ ពហុប្រព័ន្ធផ្សព្វផ្សាយអនុញ្ញាតឱ្យមានការភ្ជាប់ទំនាក់ទំនងគ្នា និងវិមជ្ឈការវប្បធម៌។

Voice - Training Voice - Sound Voice - Editing 1

គម្រោង «ការបន្លឺសំឡេងរបស់ស្ត្រីជនជាតិដើមភាគតិច និងក្រុមដែលត្រូវបានគេរើសអើង តាមរយៈពហុប្រព័ន្ធផ្សព្វផ្សាយថ្មី» គឺជាគម្រោងបណ្ដុះបណ្ដាលផ្នែកផលិតភាពយន្តឯកសារ រៀបចំឡើងដោយមជ្ឈមណ្ឌលធនធានសោតទស្សន៍បុប្ផាណា ក្រោមការឧបត្ថម្ភដោយ Voice តាមរយៈអង្គការអុកស្វាមនៅកម្ពុជា ស្ថានទូតអូស្ត្រាលីប្រចាំនៅកម្ពុជា មូលនិធិ Heinrich Böll មូលនិធិ Ford និងវិទ្យាស្ថាន Sundance ព្រមទាំងកិច្ចសហការជាមួយនឹង Cambodia Film Commission (CFC)។ វគ្គបណ្តុះបណ្តាលនេះប្រព្រឹត្តទៅរយៈពេល ២៤ ខែ ហើយផ្តល់អាហារូបករណ៍ពេញដល់បេក្ខជនចំនួន ១២ នាក់។ នៅក្នុងដំណើរការជ្រើសរើស បេក្ខជនមកពីតំបន់ជនបទ ដូចជាខេត្តមណ្ឌលគិរី រតនគិរី និងបន្ទាយមានជ័យ ត្រូវបានផ្ដល់អាទិភាព ព្រោះកម្មវិធីនេះចង់ជួយជំរុញពួកគេឱ្យថតខ្សែភាពយន្តនៅតាមខេត្តរបស់ពួកគេផ្ទាល់។ គោលបំណងនៃគម្រោងនេះ គឺដើម្បីផ្តល់សិទ្ធិអំណាច ជាពិសេសដល់ស្រ្តីជនជាតិដើមភាគតិច និងក្រុមដែលត្រូវបានគេរើសអើង និងផ្តល់សំឡេងបញ្ចេញមតិដល់ពួកគេ តាមរយៈពហុប្រព័ន្ធផ្សព្វផ្សាយថ្មី។ ដើម្បីសម្រេចបំណងនេះ មជ្ឈមណ្ឌលបុប្ផាណានឹងធ្វើការយ៉ាងជិតស្និទ្ធជាមួយយុវជនជនជាតិដើមភាគតិច និងស្ត្រីនៅក្នុងប្រទេសកម្ពុជា ដែលទទួលរងនូវអំពើហិង្សា ឬមានកាយសម្បទាមិនពេញលេញ។

លើកកម្ពស់ការយល់ដឹងពីតម្រូវការ និងផ្តល់សំឡេងបញ្ចេញមតិរបស់ជនជាតិដើមភាគតិច គឺជាកម្មវត្ថុចម្បងរបស់គម្រោង «ការបន្លឺសំឡេងរបស់ស្ត្រីជនជាតិដើមភាគតិច និងក្រុមដែលត្រូវបានគេរើសអើង តាមរយៈពហុប្រព័ន្ធផ្សព្វផ្សាយថ្មី» ។ តែលើសពីនេះទៀត គម្រោងនេះក៏នឹងជួយផងដែរក្នុងការផ្តួចផ្តើមឱ្យមានកិច្ចសន្ទនាសង្គម តាមរយៈការបញ្ចាំងខ្សែភាពយន្តដែលត្រូវបានផលិតឡើង និងធ្លាប់បញ្ចាំងនៅក្នុងមហោស្រពភាពយន្តជាតិ និងអន្តរជាតិ។

ឧបត្ថម្ភដោយ

VOICE COLOUR (For Web)    australliaHeinrich Boll (For Web)     Ford Foundation (For Web) 2       sundance (For Web)

សហការដោយ

cambodia-film-commission-logo