មជ្ឈមណ្ឌលបុប្ផាណា ដែលជាស្ថាប័នឈានមុខគេខាងបណ្ណសារសោតទស្សន៍នៅកម្ពុជា សូមចូលរួមអបអរសាទរទិវាបេតិកភណ្ឌសោតទស្សន៍ពិភពលោក ឆ្នាំ ២០១៩ ក្រោមប្រធានបទ «ការភ្ជាប់ទៅអតីតកាលតាមរយៈសំឡេង និងរូបភាព»។ ព្រឹត្តិការណ៍ពិសេសដល់ទៅ ២ នឹងកើតឡើងនៅថ្ងៃទី ២៨ ខែតុលា ខាងមុខនេះ។

១. សិក្ខាសាលាស្ដីពី «ការជួសជុល និងការបម្លែងខ្សែអាត់សំឡេង»
សិក្ខាសាលានេះរៀបចំដោយអ្នកបច្ចេកទេសរបស់មជ្ឈមណ្ឌលបុប្ផាណាផ្ទាល់។ ដោយសារកន្លែងរបស់យើងមានកំណត់ សូមអ្នកដែលមានចំណាប់អារម្មណ៍មេត្តាចុះឈ្មោះជាមុន ដោយគ្រាន់តែផ្ញើសារ (inbox) មកកាន់ទំព័រហ្វេសប៊ុករបស់មជ្ឈមណ្ឌលបុប្ផាណា។ កម្មវិធីចាប់ផ្ដើមនៅវេលាម៉ោង ១០ ព្រឹក។

២. ការបង្ហាញខ្សែអាត់សំឡេងរឿង «រាមកេរ្តិ៍ ល្ខោនខោល ពោលដោយតាសយ» និងបាឋកថា
ការបង្ហាញឯកសារដ៏កម្រ នោះគឺខ្សែអាត់សំឡេងរឿង «រាមកេរ្តិ៍ ល្ខោនខោល ពោលដោយតាសយ» ដែលរៀបរៀងដោយលោកពិ ប៊ុន្នីន។ លើសពីនេះទៀត លោក ព្រាប ចាន់ម៉ារ៉ា ដែលជាសាស្ត្រាចារ្យនៅសាកលវិទ្យាល័យភូមិន្ទវិចិត្រសិល្បៈ ក៏នឹងធ្វើបាឋកថាមួយស្ដីពី «ឥទ្ធិពលរឿងរាមកេរ្តិ៍ក្នុងប្រពៃណីខ្មែរ» ផងដែរ។ កម្មវិធីចាប់ផ្ដើមនៅវេលាម៉ោង ៥ និង ៣០ នាទីល្ងាច។

កម្មវិធីទាំងអស់ធ្វើឡើងជាភាសាខ្មែរ
ចូលរួមដោយសេរី