June 12, 2020
មជ្ឈមណ្ឌលយើងបើកដំណើរការជាធម្មតាឡើងវិញ
មជ្ឈមណ្ឌលបុប្ផាណាសូមជូនដំណឹងដល់សាធារណជនទាំងអស់ឲ្យបានជ្រាបថា មជ្ឈមណ្ឌលនឹងបើកទ្វារទទួលសាធារណជនឲ្យចូលមកទស្សនា និងស្រាវជ្រាវបណ្ណសារឡើងវិញ ចាប់ពីថ្ងៃចន្ទ ទី១៥ ខែមិថុនា ឆ្នាំ២០២០ វេលាម៉ោង៨ ព្រឹក តទៅ។
យ៉ាងណាមិញ ដោយសារស្ថានភាពនៃជំងឺកូវីដ-១៩ មិនទាន់ប្រសើរឡើងវិញទាំងស្រុងនៅឡើយ ហេតុនេះ ការរក្សាគម្លាត អនាម័យ និងការវាស់សីតុណ្ហភាព នៅតែជាចំណុចសំខាន់សម្រាប់យើងទាំងអស់គ្នាអនុវត្ត។
ខាងក្រោមនេះគឺជាអនុវត្តន៍ចាំបាច់មួយចំនួននៅមជ្ឈមណ្ឌលរបស់យើងខ្ញុំ ៖
១. សាលពិគ្រោះបណ្ណសារនៃមជ្ឈមណ្ឌលបុប្ផាណាអាចទទួលសាធារណជនឲ្យចូលទស្សនា និងស្រាវជ្រាវបណ្ណសារបានត្រឹមតែ #បីនាក់ ប៉ុណ្ណោះក្នុងមួយលើក។ ដើម្បីជាភាពងាយស្រួល និងចៀសវាងការខកខាន សម្រាប់លោកអ្នកដែលមានបំណងចង់ចូលមកកាន់សាលពិគ្រោះបណ្ណសារ សូមទាក់ទងមកកាន់យើងខ្ញុំជាមុនតាមរយៈ Facebook page របស់មជ្ឈមណ្ឌលបុប្ផាណា នោះយើងខ្ញុំនឹងអាចធានាកន្លែងជូនលោកអ្នកបាន។
២. សាលពិព័រណ៍ : សាធារណជនអាចចូលមកទស្សនាពិព័រណ៍នៅជាន់ផ្ទាល់ដីក្នុងមជ្ឈមណ្ឌលបាន ដោយរក្សាគម្លាតពីគ្នាយ៉ាងតិចពីរម៉ែត្រ។
៣. រោងភាពយន្ត : ដោយអនុលោមទៅតាមលិខិតរបស់ក្រសួងសុខាភិបាលលេខ ០៤១ សខល ចុះថ្ងៃទី ១៧ ខែមីនា ឆ្នាំ ២០២០ យើងមិនទាន់អាចដំណើរការរោងភាពយន្តបាននៅឡើយទេក្នុងអំឡុងពេលនេះ។
៤. ចំណែកឯព្រឹត្តិការណ៍វប្បធម៌នានាដែលនាំឲ្យមានការជួបជុំមនុស្សច្រើននៅក្នុងមជ្ឈមណ្ឌល ក៏ពុំទាន់ត្រូវបានអនុញ្ញាតឲ្យរៀបចំដែរក្នុងអំឡុងពេលនេះ។
មជ្ឈមណ្ឌលបុប្ផាណានឹងជម្រាបជូនដំណឹងជាបន្តទៀតនៅពេលដែលស្ថានភាពនៃជំងឺកូវីដ-១៩ មានលក្ខណៈល្អប្រសើរជាងនេះ។ យើងខ្ញុំសូមអរគុណយ៉ាងជ្រាលជ្រៅដល់លោកអ្នកដែលតែងតែគាំទ្រ និងតាមដាននូវរាល់សកម្មភាពនានារបស់មជ្ឈមណ្ឌល។ សូមបន្តរក្សាគម្លាត និងរក្សាអនាម័យផ្ទាល់ខ្លួនរបស់លោកអ្នកដោយស្មារតីប្រុងប្រយ័ត្នបំផុតដើម្បីចៀសវាងពីជំងឺកូវីដ-១៩។ ដោយក្ដីគោរព។