សង្ខេបរឿង​ ចេន សុជាតា

សហគមន៍យក្ខឡោម គឺជាសហគមន៍របស់ជនជាតិដើមភាគតិចទំពួន ដែលមានវប្បធម៍ប្រពៃណីខុសពីជាតិសាសន៍ដទៃ ជាពិសេសគឺភ្លេង។ លោកតា សេវ សែប​ ជាចាស់ទុំម្នាក់ដែលមានទេកោសល្យចេះធ្វើ និងលេងភ្លេងវប្បធម៍ជនជាតិដើមភាគតិចទំពួន។ កាលពីដើមតាចេះតពីដូនតាជំនាន់មុន បច្ចុប្បន្នតារស់នៅចម្ការឆ្ងាយពីភូមិជាមួយប្រពន្ធរបស់គាត់​​​។ប្រកបរបរធ្វើស្រែចម្ការ និងធ្វើទ្រឃ្លោកសម្រាប់លក់ដើម្បីយកថវិកាបំពេញតម្រូវការក្នុងជីវភាពរស់នៅរបស់គាត់៕លោកតាជាសិល្បករ គាត់បានបង្រៀនយុវជនក្នុងសហគមន៍ ហើយគាត់ក៏បានទៅបង្ហាញស្នាដៃ និងវប្បធម៍របស់ខ្លួនដល់ខេត្តផ្សេងៗទៀតក្នុងប្រទេស។ លោកតា ចង់ចូលរួមលើកកម្ពស់ និងផ្សព្វផ្សាយពីវប្បធម៍របស់ជនជាតិដើមភាគតិចទំពួន ដល់មហាជន ព្រមទាំងបណ្តុះគំនិតឪ្យយុវជនបានស្គាល់ពីតម្លៃរបស់ជាតិសាសន៍ ភាសា វប្បធម៍ប្រពៃណីខ្លួន តាមរយៈការបង្រៀន ការផ្តល់ជាគំរូល្អដល់ក្មេងជំនាន់ក្រោយ៕

ប្រវត្តិរូបសង្ខេប

នាងខ្ញុំឈ្មោះ ចេន សុជាតា ជាភាសាឡាតាំង CHEN SOCHEATA អាយុ ១៨ឆ្នាំ កើតថ្ងៃទី ១១ ខែមិថុនា ឆ្នាំ២០០៣ ភេទស្រី ជនជាតិដើមភាគតិចទំពួន។ មុខរបរបច្ចុប្បន្ន៖ ជាសិស្សថ្នាក់ទី១២នៃសាលាវិទ្យាល័យសម្តេចសម្តេចម៉ែ។ ទីកន្លែងកំណើត៖ ភូមិឡូន សង្កាត់យក្ខឡោម ក្រុងបានលុង ខេត្តរតនគិរី។ ទីកន្លែងរស់នៅបច្ចុប្បន្ន៖ ភូមិឡូន សង្កាត់យក្ខឡោម ក្រុងបានលុង ខេត្តរតនគិរី

បទពិសោធន៍ការងារ៖ ជាយុវជនស្ម័គ្រចិត្តថ្នាក់ខេត្ត(Volunteer for my cummunity)រយៈពេល ១ឆ្នាំ និងជាប្រធានយុវជនក្នុងភូមិឡូននៃសហគមន៍យក្ខឡោម។

ចំណាប់អារម្មណ៍

មូលហេតុដែលជំរុញអោយខ្ញុំជ្រើសរើសប្រធានបទនេះ ព្រោះខ្ញុំឃើញថាឧបករណ៍ភ្លេងនេះពិតជាសំខាន់ណាស់សម្រាប់វប្បធម៍របស់ជនជាតិដើមភាគតិចទំពួន ដែលកំពុងប្រឈមមុខនឹងការបាត់បង់ ខ្ញុំចង់ចូលរួមថែរក្សា និងចងក្រងទុកជាឯកសារអោយយុវជន និងមនុស្សក្នុងនិងក្រៅប្រទេសបានស្គាល់បានស្តាប់ភ្លេងជនជាតិដើមភាគតិចទំពួន ព្រោះកាលពីខ្ញុំនៅក្មេង ខ្ញុំមិនបានដឹងមិនបានស្គាល់ឧបករណ៍ភ្លេងរបស់ខ្ញុំឡើយ មិនដឹងបទឈ្មោះអី មិនដឹងថាមានអត្ថន័យបែបណា ពេលនេះខ្ញុំបានយល់ដឹងខ្លះពីកេរ្តិ៍ដំណែលដ៏វិសេសនេះហើយ ថែមទាំងពេលនេះខ្ញុំបានចូលរួមរៀនវគ្គ ការកសាងសមត្ថភាពយុវជនជនជាតិដើមភាគតិចនិងបង្កើតបណ្ណសារសោតទស្សន៍ជនជាតិដើមភាគតិចនៅកម្ពុជា តាមរយះវីគីមេឌៀ ទើបខ្ញុំមានឪកាសចូលរួមលើកកម្ពស់ និងចូលរួមថែរក្សាអោយនៅគង់វង្សតកូនតចៅជំនាន់ក្រោយ៕