នៅក្នុងឆ្នាំ១៩៧៣ ពោលគឺ៣ឆ្នាំក្រោយសង្គ្រាមស៊ីវិល របបសាធារណរដ្ឋខ្មែរបានគ្រប់គ្រងត្រឹមតែមួយភាគបីនៃប្រទេសកម្ពុជាប៉ុណ្ណោះ ហើយក្រៅពីនោះបានធ្លាក់ក្រោមការគ្រប់គ្រងរបស់ខ្មែរក្រហម។ តើរដ្ឋាភិបាលរបបសាធារណរដ្ឋខ្មែរនៅទីក្រុងភ្នំពេញផ្គត់ផ្គង់តម្រូវការរបស់ទីក្រុងយ៉ាងដូចម្ដេច? តើស្បៀងអ្វីខ្លះដែលមាននៅតាមហាងទំនិញនិងទីផ្សារ ហើយមានតម្លៃប៉ុន្មាន? ការទម្លាក់គ្រាប់បែក ការប្រយុទ្ធ និងការឈានទៅមុខរបស់ខ្មែរក្រហម បានបង្ខំប្រជាជននៅតាមបណ្ដាខេត្តនានាមកប្រមូលផ្ដុំនៅទីក្រុងភ្នំពេញ។ តើមានជនភៀសខ្លួនប៉ុន្មាននាក់ដែលបានមកស្នាក់នៅក្នុងទីក្រុង? តើមានចំនួន២លាននាក់មែនទេ? តើប្រជាជនភៀសខ្លួនទាំងនោះបានរស់នៅកន្លែងណាខ្លះ និងរស់នៅយ៉ាងដូចម្ដេច? ទិដ្ឋភាពជាច្រើននៅក្នុងរបប លន់ នល់ និងនៅក្នុងជម្លោះចន្លោះឆ្នាំ១៩៧០ ដល់១៩៧៥ គឺនៅតែស្ថិតក្រោមការសិក្សាស្រាវជ្រាវ ឬមិនអាចកំណត់បាននៅឡើយ។ ដោយផ្អែកទៅលើបណ្ណសារសោតទស្សន៍របស់មជ្ឈមណ្ឌលបុប្ផាណា កិច្ចពិភាក្សានេះនឹងផ្ដោតទៅលើទម្រង់ខុសគ្នាៗនៃការផ្លាស់ទីនៅភ្នំពេញកំលុងពេលមានសង្គ្រាម ការប្រឹងប្រែងរបស់រដ្ឋនៅក្នុងការគ្រប់គ្រងលំហូរប្រជាជននិងទំនិញ និងរបៀបដែលវិមាត្រផ្នែកអារម្មណ៍និងសម្ភារៈរបស់បណ្ណសារ ឆ្លុះបញ្ចាំងពីជីវភាពរស់នៅប្រចាំថ្ងៃនៅក្នុងរបបសាធារណរដ្ឋខ្មែរ។

ថ្ងៃព្រហស្បតិ៍ ទី១១ ខែកញ្ញា ឆ្នាំ២០២៥ វេលាម៉ោង៦ល្ងាច នៅមជ្ឈមណ្ឌលបុប្ផាណា។

ចូលរួមដោយសេរី និងឥតគិតថ្លៃ

បទបង្ហាញនេះនឹងធ្វើឡើងជាភាសាអង់គ្លេស