មជ្ឈមណ្ឌលធនធានសោតទស្សន៍បុប្ផាណា
ភាពយន្តថ្ងៃសៅរ៍ គឺជាកម្មវិធីបញ្ចាំងភាពយន្តប្រចាំសប្ដាហ៍ក្នុងគោលបំណងឱ្យសាធារណជនបានស្គាល់ពីភាពយន្តនៅក្នុងមូលដ្ឋានទិន្នន័យហនុមាននៃផ្នែកបណ្ណសាររបស់យើង ក៏ដូចជាសមុច្ច័យឯកជនមួយចំនួន។ ការបញ្ចាំងភាពយន្តគឺដោយឥតគិតថ្លៃ និងប្រព្រឹត្តទៅជារៀងរាល់ថ្ងៃសៅរ៍ ម៉ោង៥ល្ងាច ក្នុងសាលបញ្ចាំងភាពយន្តនៃមជ្ឈមណ្ឌលបុប្ផាណា។ សមិទ្ធិករភាពយន្តនានាតែងត្រូវបានអញ្ជើញមកដើម្បីជួបជាមួយសាធារណជន។
មិនតែនៅក្នុងថ្ងៃសៅរ៍ទេ យើងក៏ចង់ឱ្យលោកអ្នករីករាយនៅថ្ងៃផ្សេងៗទៀតដែរ! Ciné-Weekday នឹងនាំលោកអ្នកទៅទស្សនាបណ្ណសារភាពយន្តដ៏សម្បូរបែបក្នុងសមុច្ច័យរបស់យើង ជារៀងរាល់ថ្ងៃអង្គារ និងព្រហស្បតិ៍ នៅលើទំព័រ Facebook និង YouTube របស់មជ្ឈមណ្ឌលបុប្ផាណា។
«អេប-ប្រវត្តិសាស្ត្រខ្មែរក្រហម» ត្រូវបានបង្កើតឡើងដោយមជ្ឈមណ្ឌលបុប្ផាណា ក្រោមការផ្តល់មូលនិធិដោយសហភាពអឺរ៉ុប និងមូលនិធិរៃ ក្នុងការអភិវឌ្ឍឧបករណ៍ឆ្លាតវៃសម្រាប់ការសិក្សាប្រវត្តិសាស្ត្រខ្មែរក្រហម។ ព័ត៌មានទាំងនេះមានការពិនិត្យចាត់ចែងពីអ្នកជំនាញប្រវត្តិសាស្ត្រកម្ពុជា និងអន្តរជាតិ ដែលកម្មវិធីអប់រំនេះមានប្រវត្តិសាក្សីផ្ទាល់ និងការប្រមូលប្រវត្តិសាស្ត្ររួមគ្នានៃរបបខ្មែរក្រហម តាមរយៈប្រព័ន្ធផ្សព្វផ្សាយចម្រុះ រួមមានការរកឃើញរបស់អង្គជំនុំជម្រះវិសាមញ្ញក្នុងតុលាការកម្ពុជា (អវតក) និងសំឡេងអ្នករស់រានជីវិតពីរបបខ្មែរក្រហម។
បាឋកថារបស់យើងធ្វើឡើង ផ្ដោតលើប្រធានប្រវត្តិសាស្ត្រ វប្បធម៌ ស្ថាបត្យកម្ម ប្រពៃណី និងបញ្ហាប្រឈមរបស់ប្រទេសកម្ពុជានាសម័យបច្ចុប្បន្ន។ បាឋកថា ទាំងនេះក៏មានរួមទាំងការវិភាគលើរូបភាព និងអាជីពផ្នែកភាពយន្តផងដែរ។
ក្លឹបភាពយន្តផ្ដល់ឱ្យយុវជនខ្មែរដែលមានចំណាប់អារម្មណ៍លើវិស័យភាពយន្ត ដើម្បីស្វែងយល់ពីភាពយន្តដ៏ច្រើនសន្ធឹកសន្ធាប់ផលិតនៅជុំវិញពិភពលោក។ ក្រោមការធ្វើបទបង្ហាញដោយភ្ញៀវកិត្តិយស ក្លឹបភាពយន្តគឺជាឱកាសនៃការពិភាក្សា និងផ្លាស់ប្ដូរគំនិតយោបល់។ ក្លឹបភាពយន្តរៀបចំផងដែរនូវការអនុវត្តការបណ្ដុះបណ្ដាលជាក់ស្ដែងនៅក្នុងអាជីពភាពយន្ត ឧទាហរណ៍ដូចជាការសរសេរអត្ថបទភាពយន្ត ជាដើម។
ពិព័រណ៍របស់យើង គឺដកស្រង់ចេញពីសមុច្ច័យរបស់យើង។ នោះក៏ជាឱកាសចែករំលែកការឆ្លុះ បញ្ចាំងលក្ខណៈសិល្បៈនូវអតីតកាលកាន់តែទូលំទូលាយ អំពីបញ្ហាសង្គម និងប្រវត្តិសាស្ត្រ។ លើសពីការធ្វើពិព័រណ៍ យើងតែងរៀបចំការបញ្ចាំងភាពយន្ត និងបាឋកថាពិសេសៗនានា។
រំឭក ជាកម្មវិធីសហការដោយមជ្ឈមណ្ឌលធនធានសោតទស្សន៍បុប្ផាណា និងអង្គការសិល្បៈខ្មែរអមតៈ ដែលនាំមកជូនដោយ មហោស្រពរដូវកាលសិល្បៈខ្មែរ (Season of Cambodia)។ ស្ថាប័នសិល្បៈពីរដែលនាំមុខគេនៅក្នុងទីក្រុងភ្នំពេញ បានសហការគ្នាក្នុងគោលបំណងរៀបចំកម្មវិធីមនុស្សធម៌ ដែលនឹងបង្កើតជាការត្រិះរិះស្វែងយល់ពីខួបទី ៤០ ឆ្នាំ នៃការដួលរលំក្រុងភ្នំពេញចូលក្នុងដៃខ្មែរក្រហម។
ក្រៅពីកម្មវិធីក្លឹបភាពយន្ត និងភាពយន្តថ្ងៃសៅរ៍ មជ្ឈមណ្ឌលបុប្ជាណាក៏រៀបចំនូវការបញ្ចាំងភាពយន្តកម្ពុជា និងភាពយន្តបរទេស ដែលទាក់ទងនឹងព្រឹត្តិការណ៍ពិសេសៗ ដូចជាដំណើរទស្សនកិច្ចរបស់សមិទ្ធិករភាពយន្តមកពីបរទេស ឬរដូវកាលនៃមហោស្រពនានា។ ការបញ្ចាំងភាពយន្តអមជាមួយសំណួរចម្លើយ ឬកិច្ចពិភាក្សា ដើម្បីឱ្យទស្សនិកជនអាចចែករំលែកមតិយោបល់របស់ពួកគេ ក៏ដូចជាការយល់ឃើញបន្ថែមទៀតទៅលើខ្សែភាពយន្ត។
យើងបានចាប់ផ្ដើមបញ្ចាំងភាពយន្តចល័តនៅតាមបណ្ដាខេត្តនានាក្នុងប្រទេសកម្ពុជាក្នុងឆ្នាំ ២០០៨ ដើម្បីធ្វើឱ្យអ្នកដែលមិនទាន់មានឱកាស បានទស្សនាឯកសារដ៏គួរឱ្យចងចាំទាំងនេះ។ ការបញ្ចាំងភាពយន្តត្រូវបានរៀបចំឡើងជាទូទៅនៅក្នុងភូមិ ក្នុងទីធ្លាសាលារៀន ឬវត្តអារាម ដើម្បីទាក់ទាញអ្នកភូមិគ្រប់វ័យទាំងអស់។ ការជ្រើសរើសភាពយន្តធ្វើឡើងដោយដៃគូសហការរបស់យើង និងជាមួយសហគមន៍ផ្ទាល់ ហើយការបញ្ចាំងភាពយន្ត គឺធ្វើឡើងរយៈពេលច្រើនម៉ោង។ ក្នុងឆ្នាំ ២០១៣ ប្រជាជនលើសពី ២៣០០០ នាក់ បានចូលរួមទស្សនាការបញ្ចាំងភាពយន្តចល័តនេះ។
មហោស្រពភាពយន្តអន្តរជាតិកម្ពុជាលើកទី ១០ នឹងធ្វើការបញ្ចាំងខ្សែភាពយន្ដដ៏មានគុណភាពរហូតដល់ទៅ ១៥៧ ចំណងជើងមកពី ៤៤ ប្រទេសជុំវិញពិភពលោក ក្នុងនោះរួមមានភាពយន្ដខ្នាតធំ ភាពយន្ដខ្នាតខ្លី ភាពយន្តឯកសារ ព្រមទាំងភាពយន្ដគំនូរជីវចល។ ពីថ្ងៃទី ១៣ ដល់ថ្ងៃ ២២ ខែមីនា លោកអ្នកអាចរីករាយទស្សនាខ្សែភាពយន្តដែលលោកអ្នកចាប់អារម្មណ៍នៅទីតាំងចំនួន ១០ ក្នុងរាជធានីភ្នំពេញ ក្នុងនោះរួមមាន រោងភាពយន្ដ Legend (Exchange Square, TK, Eden, City Mall), រោងភាពយន្ដ Major Cineplex (Aeon 1, Sorya), មជ្ឈមណ្ឌលបុប្ផាណា, សាលមហោស្រពចតុម្មុខ, សណ្ឋាគារ Rosewood និងភូមិមហោស្រព CIFF Village by Cellcard នៅផ្សារទំនើប Exchange Square។ លោកអ្នកអាចទស្សនាដោយសេរី។ កម្មវិធីនេះរៀបចំឡើងដោយមជ្ឈមណ្ឌលបណ្ដុះបណ្ដាលជំនាញ និងទទួលការថតភាពយន្តនៅកម្ពុជា និងមជ្ឈមណ្ឌលបុប្ផាណា គាំទ្រដោយក្រសួងវប្បធម៌ និងវិចិត្រសិល្បៈ និងនាំមកជូនលោកអ្នកដោយ Cellcard។ គេហទំព័រផ្លូវការ […]
មហោស្រពបេតិកភណ្ឌភាពយន្តអន្តរជាតិ “ការចងចាំ!” គឺជាមហោស្រពដែលបង្ហាញពីបេតិកភណ្ឌភាពយន្តសាកលលោកដំបូងបង្អស់ដែលធ្វើឡើងនៅអាស៊ី។ គោលបំណងនៃមហោស្រពគឺថែរក្សាការចងចាំ និងភាសាសាកលរបស់ភាពយន្ត ព្រមទាំងអនុញ្ញាតឲ្យទស្សនិកជនបានចូលទៅកាន់បេតិកភណ្ឌរបស់មនុស្សជាតិកាន់តែទូលំទូលាយឡើង ខណៈពេលដែល ៩០% នៃភាពយន្ត ដែលត្រូវបានផលិតនៅជុំវិញពិភពលោកមុនឆ្នាំ ១៩២៩ បានបាត់បង់ទៅហើយនោះ។ គោលបំណងរបស់មហោស្រព “ការចងចាំ!” នេះ ក៏ដើម្បីបង្ហាញដល់សាធារណជន ក៏ដូចជាអ្នកជំនាញផងដែរថា ឧស្សាហកម្មភាពយន្តមិនអាចមានភាពរស់រវើកបានទេ បើគ្មានបេតិកភណ្ឌភាពយន្តចាស់ៗទេនោះ។ ជាចុងក្រោយ បញ្ហាប្រឈមមួយទៀត ដែលយើងត្រូវប្រកួតជាមួយនោះ គឺការបង្ហាញរូបភាពនៅលើអេក្រង់ធំនៅសម័យកាលឌីជីថលដូចសព្វថ្ងៃ ដើម្បីឱ្យទស្សនិកជនទទួលបានបទពិសោធន៍ផ្នែកសោភណភាពសិល្បៈ សំឡេង និងពន្លឺមួយបែបផ្សេងទៀត ខុសពីការទស្សនាតាមទូរស័ព្ទទំនើប ឬ Tablet។ គេហទំព័រ »
សប្តាហ៍នៃភាពយន្តឥណ្ឌាលើកទី ២ នឹងប្រព្រឹត្តទៅនៅទីក្រុងភ្នំពេញ ដែលចាប់ផ្តើមពីថ្ងៃទី ២២ ខែមិថុនា រហូតដល់ថ្ងៃទី ២៦ ខែមិថុនា ឆ្នាំ ២០១៦។ ជាមួយភាពយន្តចំនួន ១៤ រឿង ដែលរួមមានរឿងបែបបុរាណ បែបសម័យ និងខ្សែភាពយន្ត ដែលឈ្នះពានរង្វាន់ឥណ្ឌា នឹងចាក់បញ្ចាំងនៅសាលមហោស្រពចតុម្មុខ។ រឿងដែលបានជ្រើសរើសសុទ្ធតែជាភាពយន្តគួរជាទីពេញនិយមរបស់ទស្សនិកជន និងមានទំនាក់ទំនងជាមួយគ្រួសារ ដែលមានលក្ខណៈជាភាពយន្តកំប្លែង ភាពយន្តមនោសញ្ចេតនា និងភាពយន្តបូលីវូដ។ មហោស្រពភាពយន្តនេះជាគំនិតផ្តួចផ្តើម និងទទួលបានការឧបត្ថម្ភពីនាយកដ្ឋានវប្បធម៌នៃស្ថានទូតឥណ្ឌាប្រចាំប្រទេសកម្ពុជានៅទីក្រុងភ្នំពេញ និងទទួលរៀបចំដោយអង្គការពីរគឺមជ្ឈមណ្ឌលបុប្ជាណា និងមជ្ឈមណ្ឌលបណ្ដុះបណ្ដាលជំនាញ និងទទួលការថតភាពយន្តនៅកម្ពុជា (CFC) ដែលជាស្ថាប័នគាំទ្រវិស័យភាពយន្តនៅកម្ពុជា។ ព្រឹត្តិការណ៍នេះត្រូវបានគាំទ្រដោយក្រសួងវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា។ ចូលរួមទស្សនាដោយសេរី! ទាញយកកម្មវិធី
ភាពល្អឯកនិងគួរឱ្យទាក់ទាញនៃភាពយន្ដអឺរ៉ុប នឹងមកដល់កម្ពុជាក្នុងពេលឆាប់ៗនេះ។ ចាប់ពីថ្ងៃទី 17 ខែកុម្ភៈ ឆ្នាំ 2023 តទៅ មហោស្រពភាពយន្តអឺរ៉ុបនឹងផ្តល់ជូនទស្សនិកជន នូវរសជាតិនៃវប្បធម៌ចម្រុះរបស់សហភាពអឺរ៉ុប ជាមួយការចាក់បញ្ចាំងរយៈពេល១០ថ្ងៃនៅទីតាំងរោងភាពយន្តនានាទូទាំងទីក្រុង។ មជ្ឈមណ្ឌលបុប្ផាណាគឺជាដៃគូមួយក្នុងចំណោមដៃគូជាច្រើនសម្រាប់មហោស្រពនេះ ដែលនឹងចាក់បង្ហាញខ្សែភាពយន្ត មនោសញ្ចេតនា ស្នេហា រហូតដល់កំប្លែង ភាពយន្តឯកសារ ភាពយន្តខ្លី ថ្នាក់សិក្សាពិសេសជាមួយអ្នកជំនាញក្នុងវិស័យឧស្សាហកម្មភាពយន្ដ និងមានសកម្មភាពជាច្រើនទៀត។ FACEBOOK PAGE OFFICIAL WEBSITE EUFF SCHEDULE