ប្រកួតដោយយុត្តិធម៌
ដឹកនាំដោយអង់ដ្រេ សេឡាកូវ៉ា ឆ្នាំ២០១៤ ១០០នាទី ភាសាឆេកូ និងមានភាសាអង់គ្លេសរត់ពីក្រោម
ក្នុងឱកាសគំរប់ខួប៦០ឆ្នាំនៃទំនាក់ទំនងការទូត រវាងសាធារណរដ្ឋឆែក និងព្រះរាជាណាចក្រកម្ពុជា ស្ថានទូតសាធារណរដ្ឋឆែក បានរៀបចំកម្មវិធីភាពយន្តឆែកនៅទីក្រុងភ្នំពេញ ដោយសហការជាមួយដៃគូនានា។ ស្ថានទូតបានសហការជាមួយមជ្ឈមណ្ឌលបុប្ផាណា មានក្ដីសោមនស្សរីករាយបង្ហាញខ្សែភាពយន្តឆែក៖
ទសវត្សឆ្នាំ១៩៨០ ប្រទេសឆេកូស្លូវ៉ាគី ៖ កីឡាការនីរត់ប្រណាំងវ័យក្មេងដ៏មានទេពកោសល្យម្នាក់ឈ្មោះ អាណា ត្រូវបានគេជ្រើសរើសចូលក្រុមជម្រើសជាតិ ហើយចាប់ផ្ដើមទទួលការបង្វឹក ដើម្បីចូលរួមប្រកួតកីឡាអូឡាំពិក។ ជាផ្នែកមួយនៃការត្រៀមខ្លួន នាងត្រូវបានគេដាក់ឲ្យស្ថិតក្រោម«កម្មវិធីវេជ្ជសាស្រ្ត» សម្ងាត់មួយ ដោយចាក់ថ្នាំបង្កើនថាមពល ដែលជាប្រភេទថ្នាំញៀន។ លទ្ធផលរបស់នាងមានការប្រសើរឡើង ប៉ុន្តែបន្ទាប់ពីនាងបានដួលសន្លប់ក្នុងពេលហ្វឹកហាត់ នាងបានយល់ពីធាតុពិតនៃថ្នាំនោះ។ នាងក៏សម្រេចចិត្តបន្តការហ្វឹកហាត់របស់នាង ដោយមិនប្រើថ្នាំ ទោះបីជាម្តាយរបស់នាងមានការបារម្ភថា នាងនឹងមិនអាចតាមទាន់អត្តពលិការិនីដទៃទៀត និងមិនអាចចូលរួមកីឡាអូឡាំពិចយ៉ាងណាក៏ដោយ។ ម្តាយនាងយល់ឃើញថា នេះគឺជាឱកាសដ៏ល្អតែមួយគត់ ដែលកូនស្រីគាត់អាចគេចផុតពីរនាំងដែក។ បន្ទាប់ពីនាងបញ្ចប់ការប្រកួតនៅក្នុងប្រទេសជាលើកចុងក្រោយ ម្តាយនាងបានប្រាប់គ្រូបង្វឹកឈ្មោះ រ៉ូមែន លូនណា ថាអាណាមិនបានចាក់ថ្នាំទៀតទេ។ ពួកគេក៏ចាក់ថ្នាំនេះដល់អាណាយ៉ាងសម្ងាត់ ដោយកុហកថា ជាថ្នាំវីតាមីនគ្មានបង្កផលប៉ះពាល់អ្វីទាំងអស់។
