ចម្រៀងបុរាណរឿងរាមកេរ្តិ៍ ច្រៀងដោយ ស៊ីន ស៊ីសាមុត, ស៊ិន សាម៉ាដឹកឆូ, ឯម ធាយ និងសិល្បករជាច្រើនទៀត
នេះគឺជាចម្រៀងបុរាណអំពីរឿង #រាមកេរ្ដិ៍ ដែលត្រូវបានថតសំឡេងក្នុងទសវត្សរ៍ឆ្នាំ១៩៦០។ បណ្ណសារនេះបង្ហាញតែឈុតមួយចំនួននៃរឿងរាមកេរ្ដិ៍ប៉ុណ្ណោះ មានន័យថាពុំបរិបូណ៌គ្រប់ឈុតឡើយ។
រឿងរាមកេរ្ដិ៍នេះច្រៀងរៀបរាប់សាច់រឿងដោយលោក ស៊ីន ស៊ីសាមុត លោកយាយ ស៊ិន សាម៉ាដឹកឆូ លោកយាយ ឯម ធាយ និងសិល្បករមួយចំនួនទៀត។
រឿងរាមកេរ្ដិ៍ជាអក្សរសិល្ប៍បែបវីរកថា មានដំណើររឿងវែងឆ្ងាយ ហើយសាច់រឿងពោរពេញទៅដោយការតស៊ូលះបង់ខ្ពស់។ យុទ្ធកថាមួយនេះជារឿងព្រេងមានទំនាក់ទំនងនឹងទេពជាទីសក្ការៈ ដែលមនុស្សមួយចំនួនគិតថាជារឿងដែលត្រូវតែគោរពបូជា។ រឿងនេះមានប្រភពពីរឿង #រាមាយណៈ របស់ឥណ្ឌា ជាស្នាដៃនិពន្ធរបស់ឥសីវាល្មិកិ តែងនៅសតវត្សទី៣មុនគ.ស.។ ក្រោយពេលនិពន្ធរួចរាល់ រឿងរាមកេរ្ដិ៍មានប្រជាប្រិយភាពខ្លាំងណាស់ បានផ្សព្វផ្សាយស្ទើរគ្រប់ទីកន្លែង។ តំបន់អាស៊ីអាគ្នេយ៍បានទទួលឥទ្ធិពលនៃរឿងនេះ ហើយក្លាយជាមូលដ្ឋានគ្រឹះមួយយ៉ាងរឹងមាំផ្នែកវប្បធម៌ ជំនឿ ទំនៀមទម្លាប់ និងអក្សរសាស្រ្ដ។ សម្រាប់ប្រទេសកម្ពុជា រឿងនេះបានជ្រួតជ្រាបចូលក្នុងសង្គមខ្មែរតាំងពីសម័យមុនអង្គរមកម្ល៉េះ។
#Archives #ArchivesPreservation
