ឆ្លុះទឹកទន្លេ
ទស្សនៈខ្មែរលើជនជាតិវៀតណាម ក្នុងឃុំប្រឡាយមាស មុនសម័យខ្មែរក្រហម (ករណីសិក្សា)
លោក កែវ ដួង អ្នកស្រាវជ្រាវរបស់អង្គការក្តីករុណា
ជនជាតិវៀតណាម បានរស់នៅតាមដងទន្លេសាបរាប់ទសវត្សមកហើយ មុនពេលពួកគេ ត្រូវបានជម្លៀសចេញពីប្រទេសកម្ពុជាក្នុងទសវត្សទី៧០។ ហើយជនជាតិវៀតណាមទាំងនោះ ភាគច្រើនមានកំណើតនៅប្រទេសកម្ពុជា។ ស្ថិតនៅតាមដងទន្លេសាប និងចំងាយប្រមាណជា ២០គីឡូម៉ែតពីទីរួមខេត្តកំពង់ឆ្នាំង ឃុំប្រឡាយមាស ជាឃុំមួយក្នុងចំណោមឃុំមួយចំនួនក្នុងប្រទេសកម្ពុជាមុនសម័យខ្មែរក្រហម ដែលមានជនជាតិវៀតណាមរាប់រយគ្រួសាររស់នៅ ជាមួយប្រជាជនខ្មែរក្នុងភូមិឃុំជាមួយគ្នា។ ករណីសិក្សានេះ មានគោលបំណងវាយតម្លៃ លើទំនាក់ទំនងរវាងអ្នកភូមិខ្មែរ និងវៀតណាមក្នុងឃុំប្រឡាយមាស ដោយពិនិត្យមើលទៅលើសកម្មភាពសង្គមវប្បធម៌ និងសេដ្ឋកិច្ច តាមរយៈទស្សនៈរបស់ប្រជាជនខ្មែរ។ អ្នកភូមិខ្មែរចំនួន ២៤នាក់ ដែលធ្លាប់បានរស់នៅក្នុងឃុំប្រឡាយមាស នៅចុងសម័យអាណានិគមបារាំង សម័យសម្តេចសីហនុ និងសម័យ លន់ ណុល ត្រូវបានសម្ភាសអំពីជីវិតប្រចាំថ្ងៃ និងបទពិសោធន៍រស់នៅជាមួយសហគមវៀតណាមក្នុងឃុំនេះ។