ជាតិនិយមខ្មែរ ដែលជាប់ពាក់ព័ន្ធទៅនឹងការសម្លាប់រង្គាល
គំនិតប្រឆាំងវៀតណាម ក្នុងរបបកម្ពុជាប្រជាធិបតេយ្យ ដោយលោក កែវ ឌួង
និយាយពី ប៉ុល ពត ជាបុគ្គលអ្នកដឹកនាំ ឬក៏និយាយពី ប៉ុល ពត ជារបបនយោបាយមួយ ប្រជាជនកម្ពុជាភាគច្រើនអាចនឹងចាប់ផ្តើមនិយាយពីភាពឃោឃៅនៃរបបនោះ។ តែទោះជាយ៉ាងណា ប៉ុល ពត និងអ្នកដើរតាមមាគ៌ារបស់គាត់មួយចំនួនបានអះអាងថា អ្វីដែលពួកគាត់បានធ្វើគឺដើម្បីការពារប្រទេសជាតិ។ បទបង្ហាញនេះ ផ្តល់សមិ្មតកម្មថា ជាតិនិយមក្នុងរបបកម្ពុជាប្រជាធិបតេយ្យបានកើតឡើងក្នុងទម្រង់ជ្រុលនិយមមួយ ដែលវាកើតចេញពីគំនិតយល់ខុសមួយថា ការកំទេចអ្នកដែលត្រូវបានគេចាត់ទុកថាជាខ្មាំង ជាភារកិច្ចត្រូវតែធ្វើ ដើម្បីការពារជាតិ។ “យួនឈ្លានពាន” បានក្លាយជាជំនឿមួយដែលជាធាតុផ្សំក្នុងជាតិនិយមសម័យនោះផងដែរ ហើយ គំនិតមើលលើជាតិដទៃទាបជាងជាតិខ្លួនក៏បានក្លាយជាកត្តាកំណត់ឲ្យមានការសម្លាប់ខ្មែរ ដែលត្រូវបានគេចោទថា មានក្បាលជាយួន។ កិច្ចសម្ភាសន៍ជាមួយអតីតកម្មាភិបាលខ្មែរក្រហម និងការសិក្សាឯកសារផ្ទៃក្នុងបក្ស ការផ្សាយវិទ្យុសម្លេងកម្ពុជាប្រជាធិបតេយ្យ និងឯកសារផ្សេងៗទៀត បង្ហាញមូលហេតុមួយចំនួនខាងក្រោយការកាប់សម្លាប់ក្នុងសម័យនោះទៅលើជនជាតិវៀតណាម និងអ្នកដែលត្រូវបានចាត់ទុកថា ពាក់ព័ន្ធជាមួយវៀតណាម។
ចូលរួមដោយឥតគិតថ្លៃ !
សូមស្វាគមន៍ទាំងអស់គ្នា !
