ដានអនុស្សារ
ពិព័រណ៍រៀបចំដោយ វិចិត្រករ ស៊ួ គីមសាន
ចាប់ពីថ្ងៃទី ៥ មេសា ដល់ថ្ងៃទី ២៩ មេសា
សម្ពោធពិព័រណ៍នៅថ្ងៃទី ៥ មេសា វេលាម៉ោង ៥:៣០ ល្ងាច
ជាច្រើនពាន់ឆ្នាំមកហើយ ប្រទេសកម្ពុជាយើងបានឆ្លងកាត់នូវសម័យកាលជាច្រើនរាប់តាំងពីការកកើតទឹកដីមក។ តាំងពីសម័យបុរេប្រវត្តិ បន្ដមកដល់សម័យដែលគេស្គាល់ថាជាអាណាចក្រមួយដែលមានភាពរុងរឿងថ្កើនថ្កានគឺ សម័យអង្គរ។ កង់ប្រវត្តិសាស្ដ្រនេះនៅតែបន្ដវិលរហូតដល់សម័យដែលប្រទេសធ្លាក់ចុះជាលំដាប់ចាប់ពីក្រោយសម័យអង្គរមករហូតដល់សម័យមួយដែលវាំងននខ្មៅបាំងកម្ពុជាអោយងងឹតសូន្យគឺសម័យ ប៉ុល ពត។ ក្រោយរបបនោះផុតរលត់ទៅ កម្ពុជាខំប្រឹងទាំងត្រដាបត្រដួសក្នុងការកសាងសេដ្ឋកិច្ច ហេដ្ឋារចនាសម័ន្ធ និងពង្រឹងទំនាក់ទំនងអន្តរជាតិឡើងវិញរហូតមានស្ថេរភាពដូចបច្ចុប្បន្ននេះ។ សង្រ្គាមឈ្លានពាន ការបាត់បង់ទឹកដី គ្រួសារ ការរងផលប៉ះពាល់ដោយគ្រោះធម្មជាតិ ទុរភិគផ្សេងៗជាដើម។ ការប្រទះនូវភាពរុងរឿងសម្បូរសប្បាយ និង ភាពល្វីងជូរចត់ក្នុងពីប្រវត្តិសាស្រ្តដែលអាចពួកយើងជាន់ក្រោយអាចរៀនសូត្រថាតើអ្វីដែលគួរធ្វើ និងមិនគួរដើម្បីកសាងប្រទេសយើងទាំងអស់គ្នា។ ទន្ទឹមនឹងប្រវត្តិសាស្ដ្រមនុស្សជាតិចេះតែរំកិលតាមសម័យកាលនោះ ពួកយើងម្នាក់ៗក៏មានរឿងរ៉ាវប្រវត្តិផ្ទាល់ខ្លួនដែលរមៀលតាមសម័យទាំងនោះដែរ។ បទពិសោធន៍ជីវិតអតីតកាលរបស់ ជីដូនជីតា ឪពុកម្តាយ មាមីង មិត្តភក្ដិ រួមទាំងយើងខ្លួនផងនោះ សុទ្ធសឹងតែជាមេរៀនដ៍ល្អដែលអាចសិក្សាស្វែងយល់ពីគ្នាបានថាគួរតែប្រតិបត្តិជីវិតបែបណាដើម្បីអោយមានគុណភាព ទាំងការជួយខ្លួនឯង គ្រួសារ និងសង្គមជាតិអោយមានភាពប្រសើរឡើង។
ទោះជាយ៉ាងណាក៏ដោយ វិស័យសិល្បៈបានដើរតួរនាទីយ៉ាងសំខាន់ក្នុងជីវិតរស់នៅរបស់ខ្មែរតាំងពីសម័យអតីតកាលរហូតមកដល់បច្ចុប្បន្ន។ ស្នាដៃស្នាដៃសិល្បៈរបស់បុព្វបុរសខ្មែរដែលបានបន្សល់ទុកមានភាពសម្បូរបែបប្រកបដោយទេពកោសល្យ។ ដោយសារតែប្រទេសកម្ពុជាបានឆ្លងកាត់ប្រវត្តិសាស្រ្តជាច្រើនសម័យកាល និងបានជួបប្រទះនូវស្ថានភាពជាច្រើនរាប់មិនអស់ផងនោះរួមមានទាំងការរីកចម្រើនដល់កំពូលដែលក្លាយជាអរិយប្រទេស និងធ្លាក់ចូលក្នុងវិបត្តិដល់ចំណុចសូន្យ ដែលជាហេតុនាំអោយវិស័យសិល្បៈក៏មានដំណើរឡើងចុះទៅតាមនោះដែរ។ បន្ទាប់ពីសង្រ្គាមស៊ីវិលដែលបានអូសបន្លាយប៉ុន្មានសតវត្សចុងក្រោយនេះត្រូវបានបញ្ចប់ ទើបវិស័យនានាបានងើបឡើងវិញបន្តិចម្តងៗ ក្នុងនោះផ្នែកវិចិត្រសិល្បៈបានប្រឹងងើបបន្តដំណើរទៅមុខដូចគ្នា។ ក្នុងនាមជាបានសិក្សាផ្នែកវិចិត្រ និង អ្នកស្រឡាញ់សិល្បៈដូចគ្នា ពួកយើងបានចាប់ផ្តើមចងក្រងសិល្បករមួយចំនួនតូចនៅប្រទេសកម្ពុជាយើងដើម្បីធ្វើពិពណ៍រួមតំបូងនេះឡើង ។ ក្រុមរបស់ពួកយើងទៀតសោតមានទាំងសិល្បករខាងគំនូរពណ៍ប្រេង ពណ៍ទឹក ចម្លាក់ បោះពុម្ភ និងតម្លើង(Installation) ក្នុងវត្ថុបំណងចំបងធំគឺ ដើម្បីចូលរួមលើកស្ទួយ អភិរក្ស និងអភិវឌ្ឍន៍វិស័យសិល្បៈវប្បធម៌ជាតិដោយផ្សាភ្ជាប់នូវការចែករំលែកចំណេះដឹង ចំណងមិត្តភាព ភាតរភាព សាមគ្គីភាព និងសន្តិភាពពីបច្ចុប្បន្នទៅអនាគត។
“ដានអនុស្សារ” បានក្លាយជាសារក្នុងពិពណ៍រួមគ្នាតំបូងតាមរយៈស្នាដៃរបស់ពួកយើងដែលបានដាក់តាំងបង្ហាញនេះដោយបង្ហាញពីការរំលឹកនូវការចងចាំ អនុស្សាវរីយ៍អតីតកាល និងបទពសោធន៍នានាដែលយើងបានរៀន និងឆ្លងកាត់កន្លងមក។ ពួកយើងសង្ឃឹមថាវានឹងជាសារមួយដ៍មានសារសំខាន់ដែលអាចអោយពួកយើងស្វែងយល់ផ្លាស់ប្តូរបទពិសោធន៍គ្នាទៅវិញទៅមកបាន រវាងសិល្បករ និងសិល្បករក៍ដូចជាសាធារណជនទូទៅដែរ។
ចូលរួមដោយសេរី
