ភាពយន្តឯកសារ៖ ការអភិរក្សសត្វដំរីក្នុងសហគមន៍ជនជាតិដើមភាគតិចនៅកម្ពុជា – Online
ដឹកនាំដោយសមិទ្ធិករភាពយន្តវ័យក្មេង១២រូប ឆ្នាំ២០២០ រយៈពេល៥៤នាទី ភាសាព្នង និងខ្មែរ មានអក្សរអង់គ្លេសរត់ពីក្រោម
នៅថ្ងៃទី៥ ខែមិថុនា ឆ្នាំ២០២១ ខាងមុខនេះ ដែលត្រូវជា “ទិវាបរិស្ថានពិភពលោក” មជ្ឈមណ្ឌលបុប្ផាណាមានកិត្តិយសសូមជូនកម្មវិធីបញ្ចាំងភាពយន្តតាមប្រព័ន្ធអនឡាញ (Online) ពិសេសមួយ ដើម្បីអបអរសាទរទិវាដ៏មានអត្ថន័យនេះ។
១. ជម្រកខ្ញុំ
ដឹកនាំដោយ ជួន សុភាណា, ម៉ិច ជូឡាយ, យ៉ាំ សុភ័ក្ត្រ, មាន សុចិត្រា, ឈាន ពិសេន, ២០២០, ២៨នាទី, ភាសាព្នង និងខ្មែរ មានអក្សរអង់គ្លេសរត់ពីក្រោម
ធួក ឆឺល មិនដែលប្រាថ្នាចង់ធ្វើអ្វីផ្សេងក្រៅពីហ្មដំរីនោះទេ។ ជានិច្ចកាល គាត់តែងតែចូលទៅក្នុងព្រៃដើម្បីឃ្វាលដំរី។ ប៉ុន្តែ ជម្រកធម្មជាតិនៅក្នុងខេត្តមណ្ឌលគិរីចាប់ផ្ដើមរួមតូចទៅៗដោយសារការកាប់បំផ្លាញ ដែលគំរាមកំហែងយ៉ាងខ្លាំងទៅដល់សត្វដំរី ប្រព័ន្ធអេកូឡូស៊ី និងឆាកជីវិតរបស់ឆឺលផ្ទាល់។
២. ដានស្រអាប់
ដឹកនាំដោយ ខុន រក្សា, ពៅ មនោ, ជើយ រីកគីដេវីដ, ២០២០, ១១នាទី, ភាសាព្នង និងខ្មែរ មានអក្សរអង់គ្លេសរត់ពីក្រោម
បើទោះជាពិការភ្នែកម្ខាង និងមានរបួសផ្លូវចិត្តព្រោះតែសង្គ្រាមរាប់ឆ្នាំ និងការទម្លាក់គ្រាប់បែករបស់សហរដ្ឋអាមេរិកក៏ដោយ ដំរីមេណាងនៅតែព្យាយាមរស់បន្តទៀតដោយទទួលបានការអាណិតស្រលាញ់ និងថែទាំពី ច្រិត ដា ដែលជាហ្មដំរីម្នាក់ក្នុងខេត្តមណ្ឌលគិរី។
៣. មរតក
ដឹកនាំដោយ ពៅ ធាង, សាត ស្រីតូច, សួស សុណាន់, ២០២០, ១៤នាទី, ភាសាព្នង និងខ្មែរ មានអក្សរអង់គ្លេសរត់ពីក្រោម
ក្នុងនាមជាបង្គោលគ្រួសារមួយរស់នៅក្នុងខេត្តមណ្ឌលគិរី អ្នកស្រី ព្រេង ចាន់ធី បានខិតខំថែរក្សាប្រពៃណីជនជាតិដើមភាគតិចរបស់ខ្លួន មិនថាជាការមើលថែដំរី ឬក៏ការបិតស្រាពាងថ្វាយព្រលឹងដូនតានោះឡើយ ដោយគាត់បានផ្ទេរមរតកទាំងអស់នេះទៅកាន់កូនចៅគាត់ជំនាន់ក្រោយទៀត។
ការបញ្ចាំងភាពយន្តនេះអមដោយកិច្ចពិភាក្សារវាងសមិទ្ធិករភាពយន្តវ័យក្មេង តំណាងម្ចាស់ជំនួយ និងដៃគូសហការនៃគម្រោង “ការអភិរក្សសត្វដំរី និងបទពិសោធរបស់ជនជាតិដើមភាគតិចនៅកម្ពុជា”។ គម្រោងស្ថិតនៅក្រោមការផ្ដល់មូលនិធិពី Arts and Humanities Research Council និងកិច្ចសហការរវាងសាកលវិទ្យាល័យ Bath, សាកលវិទ្យាល័យ Queen’s University Belfast, សាកលវិទ្យាល័យ Leeds, មជ្ឈមណ្ឌលបុប្ផាណា និងអង្គការថែរក្សាសត្វដំរី ជីវភាពរស់នៅ កិច្ចផ្ដួចផ្ដើម និងបរិស្ថាន (ELIE)។
សូមចូលរួមអបអរសាទរទិវាបរិស្ថានពិភពលោក ៥ មិថុនា ទាំងអស់គ្នា! និងសូមជួយចែករំលែកដំណឹងនេះទៅកាន់មិត្តភក្ដិរបស់អ្នកឱ្យបានដឹងផង!
ថ្ងៃសៅរ៍ ទី៥ ខែមិថុនា ឆ្នាំ២០២១ វេលាម៉ោង៥ល្ងាច នៅលើទំព័រ Facebook (Bophana Center), YouTube channel (Bophana Center) និងគេហទំព័ររបស់មជ្ឈមណ្ឌលបុប្ផាណា។