ភាពយន្តឯកសារ៖ ជីវិតតស៊ូក្រោមសម្ពាធកូវីដ-១៩ – Online
ដឹកនាំដោយ ឌិន រ៉ូដា, ព្រឹល ព្រីង, ឆ្នាំ២០២០, ២៦នាទី, ភាសាខ្មែរ មានអក្សរអង់គ្លេសរត់ពីក្រោម
ទាំងនេះគឺជាភាពយន្តឯកសារផលិតដោយសមិទ្ធិករភាពយន្តវ័យក្មេងនៃគម្រោង “ការបន្លឺសំឡេងរបស់ស្ត្រីជនជាតិដើមភាគតិច និងក្រុមដែលត្រូវបានគេរើសអើង តាមរយៈពហុប្រព័ន្ធផ្សព្វផ្សាយថ្មី” អនុវត្តដោយមជ្ឈមណ្ឌលបុប្ផាណា បង្ហាញពីការតស៊ូរបស់ប្រជាជនខ្មែរក្នុងខេត្តបន្ទាយមានជ័យក្នុងអំឡុងវិបត្តិកូវីដ-១៩ និងការចំណាកស្រុកទៅប្រទេសថៃ។
១. គ្មានជម្រើស
ដឹកនាំដោយ ឌិន រ៉ូដា, ២០២០, ១១នាទី, ភាសាខ្មែរ មានអក្សរអង់គ្លេសរត់ពីក្រោម
អ្នកស្រី រួម និងគ្រួសារគាត់កំពុងធ្វើការនៅឯប្រទេសថៃ ប៉ុន្តែវិបត្តិកូវីដ-១៩ បានបង្ខំឱ្យពួកគេត្រឡប់មកស្រុកវិញ។ ទាំងពីរនាក់ប្ដីប្រពន្ធបានការងារថ្មីធ្វើនៅឯការដ្ឋានសំណង់មួយកន្លែងនៅម្ដុំស្ពានទឹកថ្លា ក្រុងសិរីសោភ័ណ ខេត្តបន្ទាយមានជ័យ ហើយគ្រប់ពេល ពួកគេតែងតែយកកូនទាំងបីនាក់ (អាយុ ៤, ១២, និង ១៤ឆ្នាំ) ទៅតាមជានិច្ច ដោយហេតុពួកគេគ្មានលុយឱ្យកូនទាំងបីនាក់ទៅសាលារៀនឡើយ។
២. ចំណាក
ដឹកនាំដោយ ព្រឹល ព្រីង, ២០២០, ១៥នាទី, ភាសាខ្មែរ មានអក្សរអង់គ្លេសរត់ពីក្រោម
នាចុងរដូវភ្លៀងធ្លាក់ម្ដងៗ នូ ភឺន និង ភីម សារុន តែងចេញទៅប្រទេសថៃដើម្បីរកការងារធ្វើ ប៉ុន្តែឆ្នាំនេះ មានការរីករាលដាលជំងឺកូវីដ-១៩ ជាហេតុនាំឱ្យច្រកទ្វារព្រំដែនត្រូវបានបិទ។ បើទោះជាមានការរឹតត្បិតយ៉ាងម៉េចក្ដី ពួកគេបានប្រថុយលួចរត់ចេញដោយខុសច្បាប់ ដោយយកកូនប្រុសអាយុ ១៨ ឆ្នាំទៅជាមួយផង។
ការបញ្ចាំងភាពយន្តនេះក៏នឹងមានអមដោយកិច្ចសំណេះសំណាលជាមួយសមិទ្ធិករភាពយន្តវ័យក្មេងគឺលោក ឌិន រ៉ូដា ស្ដីអំពី “ជីវិតក្រោមសម្ពាធកូវីដ-១៩ និងការចំណាកស្រុក” ដែលនឹងធ្វើឡើងជាភាសាខ្មែរ។ វេទិកាសំណួរចម្លើយក៏នឹងបើកសម្រាប់ទស្សនិកជនផងដែរ។
ថ្ងៃព្រហស្បតិ៍ ទី១០ ខែមិថុនា ឆ្នាំ២០២១ វេលាម៉ោង៥ល្ងាច នៅលើទំព័រ Facebook (Bophana Center)។