ភាពយន្តឯកសារ៖ ការអប់រំក្នុងសហគមន៍ជនជាតិដើមភាគតិច – Online
ដឹកនាំដោយ ភោគ រ៉ានី, រ៉េត ស៊ីថត, ឆ្នាំ២០១៩, ២៤នាទី, ភាសាខ្មែរ គ្រឹង និងព្នង មានអក្សរខ្មែររត់ពីក្រោម
ទាំងនេះគឺជាភាពយន្តឯកសារផលិតដោយសមិទ្ធិករភាពយន្តវ័យក្មេងនៃគម្រោង “ការបន្លឺសំឡេងរបស់ស្ត្រីជនជាតិដើមភាគតិច និងក្រុមដែលត្រូវបានគេរើសអើង តាមរយៈពហុប្រព័ន្ធផ្សព្វផ្សាយថ្មី” អនុវត្តដោយមជ្ឈមណ្ឌលបុប្ផាណា បង្ហាញពីជីវិតរបស់បងប្អូនជនជាតិដើមភាគតិចក្នុងប្រទេសកម្ពុជា និងផ្ដោតសំខាន់ទៅលើការអប់រំក្នុងសហគមន៍។
១. កុំបោះបង់
ដឹកនាំដោយ ភោគ រ៉ានី, ឆ្នាំ២០១៩, ១១នាទី, ភាសាខ្មែរ និងគ្រឹង មានអក្សរខ្មែររត់ពីក្រោម
នៅខេត្តរតនគិរី ឆវីបានព្យាយាមយ៉ាងពេញទំហឹងដើម្បីបង្រៀនភាសាគ្រឹងដល់កុមារក្នុងភូមិ។ ដោយមានការគាំទ្រពីឪពុកម្ដាយសិស្ស និងប្តីរបស់នាងដែលធ្វើការឆ្ងាយពីផ្ទះ ឆវីមិនបោះបង់ការងារនេះជាដាច់ខាត។ សម្រាប់នាង ការថែរក្សាអត្តសញ្ញាណរបស់ពួកគេជារឿងសំខាន់បំផុត។
២. សង្ឃឹមចុងក្រោយ
ដឹកនាំដោយ រ៉េត ស៊ីថត, ២០១៩, ១៣នាទី, ភាសាខ្មែរ និងព្នង មានអក្សរខ្មែររត់ពីក្រោម
ម្លែក ផុន ប្រកបរបរធ្វើស្រែ។ នាងបានឈប់រៀនដើម្បីជួយឪពុកម្តាយនាង។ ប្អូនប្រុសបន្ទាប់របស់នាងក៏បានឈប់រៀនដូចគ្នាដើម្បីជួយនាងបន្ថែម។ មានតែប្អូនប្រុសទីពីរ និងប្អូនស្រីរបស់នាងទេដែលអាចទៅរៀនបាន។ ប៉ុន្តែប្អូនប្រុសរបស់នាងចូលចិត្តលេងហ្គេមជាងរៀនសូត្រ។ ក្តីសង្ឃឹមចុងក្រោយបង្អស់របស់គ្រួសារនាង គឺប្អូនស្រីតូច…។
ការបញ្ចាំងភាពយន្តនេះក៏នឹងមានអមដោយកិច្ចសំណេះសំណាលជាមួយសមិទ្ធិករភាពយន្តវ័យក្មេងទាំងពីរស្ដីអំពី “ការអប់រំក្នុងសហគមន៍ជនជាតិដើមភាគតិច” ដែលនឹងធ្វើឡើងជាភាសាខ្មែរ។ វេទិកាសំណួរចម្លើយក៏នឹងបើកសម្រាប់ទស្សនិកជនផងដែរ។
ថ្ងៃព្រហស្បតិ៍ ទី៣ ខែមិថុនា ឆ្នាំ២០២១ វេលាម៉ោង៥ល្ងាច នៅលើទំព័រ Facebook (Bophana Center), YouTube (Bophana Center) និងគេហទំព័រមជ្ឈមណ្ឌលបុប្ផាណា។