អ្នកមីង ទូច ណាត ជាខ្មែរអុីស្លាម រស់នៅលើទូករសាត់អណ្ដែតលើទឹកតាមបណ្ដោយមាត់ទន្លេក្នុងទីក្រុងភ្នំពេញ។ ជារៀងរាល់ថ្ងៃ គាត់តែងដើររើសអេតចាយដែលគេបានបោះចោលនៅតាមវាល ក្រោយពីគេបរិភោគរួចនិងនៅតាមធុងសំរាមដែលដាក់នៅតាមផ្លូវមាត់ទន្លេ។ ប្ដីរបស់គាត់ជាជនមានពិការភាព ព្រោះការរងគ្រោះថ្នាក់ចរាចរណ៍កាលពីជាង១០ឆ្នាំមុន។ ពួកគាត់មានកូនស្រីម្នាក់ អាយុ៧ឆ្នាំ ដែលល្មមនឹងអាចចូលរៀនសូត្របាន។ ប៉ុន្ដែដោយសារជីវភាពគ្រួសារខ្វះខាត និងមានជំងឺប្រចាំកាយផង កូនស្រីរបស់គាត់មិនបានចូលសិក្សារៀនឡើយ ដោយជំនួសមកវិញនៅការដើររើសអេតចាយជាមួយម្ដាយដើម្បីផ្គត់ផ្គង់ជីវភាពគ្រួសារ។