សូមស្វាគមន៍មកកម្ពុជា៖ ពីតំបន់សង្គ្រាមមកជាតំបន់ទេសចរណ៍
រូបថតដោយលោក ប៉ូល ខាំមីង
ទោះបីមិនមែនជាអ្នកសារព័ត៌មាន ឬជាអ្នកថតរូបអាជីពក៏ដោយ លោក ប៉ូល ខាំមីង (Paul Cummings) ជាភ្ញៀវទេសចរដំបូងដែលបានមកដល់ប្រទេសកម្ពុជាក្រោយសង្គ្រាម និងបានឆ្លៀតឱកាសចងក្រងឯកសាររូបថតបង្ហាញពីទិដ្ឋភាពដ៏កម្រជាច្រើនក្នុងប្រទេសកម្ពុជាក្រោយសង្រ្គាមដ៏ឃោរឃៅ និងការប្រល័យពូជសាសន៍។
ក្រោយពីលោកបានដឹកនាំក្រុមហ៊ុនទេសចរណ៍មួយដោយជោគជ័យ លោកបាននាំភ្ញៀវទេសចរជាក្រុមដំបូងគេបង្អស់មកកាន់រាជធានីភ្នំពេញ និងប្រាសាទអង្គរវត្ត ក្រោយការដួលរលំនៃរបបខ្មែរក្រហម និងថែមទាំងបានរៀបចំដំណើរទស្សនកិច្ចឯកជនជាច្រើនមកកាន់ប្រទេសនេះដើម្បីត្រួសត្រាយតំបន់ទេសចរណ៍ថ្មីៗបន្ថែមទៀតដោយចាប់ផ្តើមក្នុងឆ្នាំ១៩៨៣។
“សូមស្វាគមន៍មកកម្ពុជា៖ ពីតំបន់សង្គ្រាមមកជាតំបន់ទេសចរណ៍” ដកស្រង់ចេញពីរូបថតរាប់រយសន្លឹកដែលលោកបានថតពីប្រទេសកម្ពុជាក្នុងសម័យនោះ និងតាំងបង្ហាញជាអចិន្ត្រៃយ៍ក្នុងគេហទំព័ររបស់មជ្ឈមណ្ឌលធនធានសោតទស្សន៍បុប្ផាណា។
