នៅថ្ងៃទី២៤ ខែមេសា ឆ្នាំ២០២៤ មជ្ឈមណ្ឌលបុប្ផាណាមានកិត្តិយសដែលបានសហការជាមួយស្ថានទូតអូស្ត្រាលី ក្នុងការរៀបចំកិច្ចពិភាក្សាក្រោមប្រធានបទ «ការចូលរួមថែរក្សាអត្តសញ្ញាណជនជាតិដើមភាគតិចតាមរយៈសិល្បៈ និងភាពយន្ត» រវាងសហគមន៍ជនជាតិដើមភាគតិចផ្សេងៗគ្នាមកពីប្រទេសកម្ពុជា និងអូស្ត្រាលី មានដូចជាសហគមន៍ក្រុមជនជាតិដើមភាគតិចទំពួន គ្រឹង កួយ និង ជនជាតិដើម Gamilaraay។ ព្រឹត្តិការណ៍នេះ ជាវេទិកាមួយសម្រាប់កិច្ចសន្ទនា ការស្វែងយល់ និងការផ្លាស់ប្តូរវប្បធម៌រវាងគ្នា និងគ្នា។

ការចែករំលែករបស់តារាចម្រៀង និងអ្នកនិពន្ធបទចម្រៀងជនជាតិអូស្ត្រាលី Mitch Tambo ដែលជាជនជាតិដើម Gamilaraay និងភរិយារបស់លោកឈ្មោះ Lele ដែលជាជនជាតិដើមភាគតិច West Papuan បានបង្ហាញពីភាពសម្បូរបែបអំពីវប្បធម៌ជនជាតិដើមភាគតិចរបស់ពួកគេ តាមរយៈតន្ត្រី និងការសម្តែង។ ក្នុងនោះផងដែរ សិល្បករជនជាតិដើមភាគតិចនៅក្នុងប្រទេសកម្ពុជា មានដូចជា ក្រុមសម្តែងរបាំយីកេជនជាតិដើមភាគតិចកួយ អ្នកសម្តែងរបាំជនជាតិដើមភាគតិចគ្រឹង និងសមិទ្ធិករភាពយន្តវ័យក្មេងជនជាតិដើមភាគតិចទំពួនក៏បានចួលរួមចែករំលែកពីការសម្តែងរបាំយីកេ ការអនុវត្តទំនៀមទំលាប់ ប្រពៃណី វប្បធម៌ និងភាសា ព្រមទាំងការប្រឈមផ្សេងៗនៅក្នុងសហគមន៌ជនជាតិភាគតិចរបស់ខ្លួន។