January 15, 2020
សេចក្តីជូនដំណឹងស្តីពីការជ្រើសរើសសិស្សចូលរៀនវគ្គបណ្តុះបណ្តាលផ្នែកផលិតភាពយន្តឯកសារ និងពហុប្រព័ន្ធផ្សព្វផ្សាយ
ដោយធ្វើសហការជាមួយ University of Bath របស់ចក្រភពអង់គ្លេស និង Elephant Livelihood Initiative Environment (ELIE, Cambodia) មជ្ឈមណ្ឌលធនធានសោតទស្សន៍បុប្ផាណា ត្រូវការជ្រើសរើសយុវជនកម្ពុជាចំនួន១២រូប ដើម្បីចូលរួមនៅក្នុងគម្រោងរបស់ The Arts and Humanities Research Council និង Global Challenges Research Fund ស្តីពី “ការអភិរក្សសត្វដំរីនិងបទពិសោធន៍របស់ជនជាតិដើមភាគតិចនៅកម្ពុជា : ការផ្តោតការយកចិត្តទុកដាក់លើបរិស្ថាន តាមរយៈការបង្កើតភាពយន្ត”។
គម្រោងនេះនឹងអភិវឌ្ឍធនធានផ្នែកភាពយន្ត ដើម្បីផ្សារភ្ជាប់ជាមួយសាធារណជននៅប្រទេសកម្ពុជា និងនៅលើពិភពលោកស្តីពីបញ្ហាប្រឈមដែលមានភាពទាក់ទងគ្នាជុំវិញការអភិរក្សសត្វដំរី បញ្ហាដែលសហគមន៍ជនជាតិដើមភាគតិចកំពុងជួបប្រទះ និងទំនាក់ទំនងរវាងបរិស្ថានធម្មជាតិ និងផលប៉ះពាល់ពីការបំផ្លាញបរិស្ថានធម្មជាតិ។
លក្ខខណ្ឌនៃការជ្រើសរើស ៖
– យុវជនកម្ពុជា ដែលមានអាយុចាប់ពី១៨ ដល់ ២៥ឆ្នាំ (ស្ត្រី និងជនជាតិដើមភាគតិច ត្រូវបានផ្ដល់អាទិភាព)
– ជាអ្នកដែលមានកម្រិតវប្បធម៌ចាប់ពីសញ្ញាបត្រមធ្យមសិក្សាទុតិយភូមិ (បាក់ឌុប) ឡើងទៅ (អ្នកមានចំណេះដឹងភាសាអង់គ្លេស និងកុំព្យូទ័រ ត្រូវបានផ្ដល់អាទិភាព)
– ជាអ្នកដែលមានចំណង់ចំណូលចិត្តខ្ពស់ផ្នែកភាពយន្ត និងជាអ្នកដែលស្រឡាញ់បរិស្ថាន
– ជាអ្នកដែលមានចំណង់ចំណូលចិត្តក្នុងការធ្វើការងារជាក្រុម
– ជាអ្នកដែលមានពេលវេលាគ្រប់គ្រាន់ក្នុងការចូលរួមគ្រប់វគ្គបណ្ដុះបណ្ដាលទាំងអស់ ចាប់ពីខែកុម្ភៈ ឆ្នាំ២០២០ រហូតដល់ខែមករា ឆ្នាំ២០២១
អត្ថប្រយោជន៍ដែលសិក្ខាកាមនឹងទទួលបាន ៖
– ការអភិវឌ្ឍជំនាញ និងការបណ្តុះបណ្តាលផ្នែកដំណើរការផលិតភាពយន្តនៅក្នុងពេលផលិត និងក្រោយផលិត ពីគ្រូបង្រៀនដែលមានបទពិសោធន៍លើការងារផលិតភាពយន្តរយៈពេលជាច្រើនឆ្នាំ
– ឱកាសផលិតស្នាដៃភាពយន្តឯកសារនៅក្នុងខេត្តមណ្ឌលគិរី
– ឱកាសចូលរួមផ្សព្វផ្សាយភាពយន្តរបស់ខ្លួននៅក្នុងខេត្តមណ្ឌលគិរី និងរាជធានីភ្នំពេញ
សម្រាប់អ្នកដែលមានចំណាប់អារម្មណ៍ចង់ចូលរួមវគ្គបណ្តុះបណ្តាលនេះ សូមបំពេញបែបបទដាក់ពាក្យសុំចូលរៀន (Application form) ជីវប្រវត្តិសង្ខេប (CV) និងលិខិតបញ្ជាក់ពីចំណាប់អារម្មណ៍ (Cover Letter) រួចផ្ញើមកកាន់អាសយដ្ឋាន ៖
– មជ្ឈមណ្ឌលធនធានសោតទស្សន៍បុប្ផាណា ផ្ទះលេខ៦៤ ផ្លូវលេខ២០០ សង្កាត់បឹងរាំង ខណ្ឌដូនពេញ រាជធានីភ្នំពេញ ឬផ្ញើមក
– អ៊ីម៉ែល piseth.tieng@bophana.org និង info@bophana.org ។
លោកអ្នកអាចទាញយកបែបបទដាក់ពាក្យសុំចូលរៀនជាទម្រង់ ៖ Word ឬ PDF
– កាលបរិច្ឆេទនៃការឈប់ទទួលពាក្យសុំចូលរៀន គឺនៅត្រឹមថ្ងៃទី១០ ខែកុម្ភៈ ឆ្នាំ២០២០
– ថ្ងៃចាប់ផ្តើមចូលរៀន ៖ ថ្ងៃទី១៧ ខែកុម្ភៈ ឆ្នាំ២០២០
សម្រាប់ព័ត៌មានបន្ថែម សូមហៅទូរស័ព្ទទៅកាន់លេខ ៖ ០១០ ៧៧៥ ១៥១ ឬ ០៩២ ៦០៥ ១២៧។
