កម្មវិធីសម្ភោធសៀវភៅ រាជិនីសំឡេងមាស
រៀបចំដោយ អវតារ និងមជ្ឈមណ្ឌលបុប្ផាណា
សង្ខេប ៖ រស់ សេរីសុទ្ធា ជាអ្នកចម្រៀងខ្មែរដ៏ល្បីល្បាញជាងគេម្នាក់នៅអំឡុងឆ្នាំ ១៩៦០ និង ៧០ និងនៅបន្តរក្សាភាពល្បីល្បាញរហូតដល់ពេលនាងបាត់ដំណឹងនៅក្នុងរបបខ្មែរក្រហម។
គឺនារីវ័យក្មេងម្នាក់នេះហើយដែលបានជួយធ្វើឱ្យវិស័យតន្ត្រីរ៉ក់នៅកម្ពុជាល្បីរន្ធឺខ្ទរខ្ទា។ សៀវភៅនេះបង្ហាញពីជីវិតការងាររបស់នាងដែលចេញពីប្រភពអ្នកស្រែចម្ការ មកក្លាយជាអ្នកចម្រៀងនារីគ្មានគូប្រៀបម្នាក់នាទសវត្សរ៍ឆ្នាំ ៦០-៧០។ ភាពជោគជ័យរបស់នាងបានមកពីការថតថាសច្រើនជាងគេ ហើយអំឡុងពេលដែលនាងចេញច្រៀង នាងថតបានជាង ៥០០ បទ ដែលមានចម្រុះគ្រប់ចង្វាក់ មិនថាប្រភេទតន្ត្រីញាក់កន្ត្រាក់អារម្មណ៍ដូចជា បូឡេរ៉ូ ឬអាហ្គោហ្គោ ឬក៏ប្រភេទមនោសញ្ចេតនាទន់ភ្លន់លន្លង់លន្លោចទេ។
នៅដើមឆ្នាំ ១៩៧០ ថ្វីត្បិតតែកម្ពុជាកំពុងតែចូលខ្លួនក្នុងសង្គ្រាមស៊ីវិលក្ដី តែជីវិតការងាររបស់នាងរឹតតែឈានឡើងដល់កម្រិតកំពូល! លើសពីការច្រៀង នាងចូលបម្រើការនៅកងទ័ពឆត្រយោង ហើយក្លាយខ្លួនជាស្ត្រីខ្មែរដំបូងគេម្នាក់ដែលបានលោតឆត្រយោង។ តែជាអកុសល បន្ទាប់ពីប្រទេសឆ្លងកាត់សង្គ្រាមរ៉ាំរ៉ៃអស់រយៈពេលជាច្រើនឆ្នាំមក ពួកខ្មែរក្រហមក៏ចូលកាន់កាប់អំណាច ហើយនាំប្រទេសជាតិ ព្រមទាំងយុគសម័យមាសនៃតន្ត្រីរបស់ខ្មែរធ្លាក់ដល់ក្នុងនរកអវចី។ ដូចតន្ត្រីករ និងសិល្បករភាគច្រើនទៀតដែរ នាងបាត់បង់ជីវិតតាំងពីសម័យនោះមក។
រូបស្លាប់ពិត តែសំឡេងរបស់ រស់ សេរីសុទ្ធា នៅតែបំពេ និងបន្តទុកជាកេរដំណែលឆ្លាក់ក្នុងក្រអៅបេះដូងមនុស្សគ្រប់រូបរហូតដល់សព្វថ្ងៃនេះ។
អំពីសៀវភៅ ៖
រាជិនីសំឡេងមាស គឺជារឿងរ៉ាវជីវិតមួយដែលរួមបញ្ចូលទេពកោសល្យដ៏កម្រ សេចក្ដីក្លាហាន ការឈឺចាប់ ភាពជូរចត់ រឿងខកចិត្ត និងការតាំងចិត្ត។ សៀវភៅនេះនឹងនាំលោកអ្នកទៅកាន់ពិភពយុគសម័យមាសនៃតន្ត្រីនៅកម្ពុជា ដោយសារកម្រងចម្រៀងជ្រើសរើសយ៉ាងពិសេសដាក់អមនឹងសាច់រឿង។ ជាបទពិសោធន៍ដ៏អស្ចារ្យមិនធ្លាប់មានពីមុនមក!
